議員過聖誕 各有大計
[2014.12.24] 發表
【明報專訊】聖誕期間，立法會議員都可以放個長假，噚日開始立法會都無會，直至明年再開工，其中工聯會鄧家彪，就話聖誕過後會同老婆同5歲囡囡去峇里玩幾日，原來佢唔喺聖誕正日外遊，係因為囡囡26號喺大埔文娛中心做粵劇表演。
阿彪話阿囡自己好鍾意睇大戲，試過放長假比卡通片同《帝女花》嘅碟畀阿囡揀，阿囡睇好多次都仲係話要睇《帝女花》，於是就畀佢去學做大戲，今次算係第一次公開表演，做老竇嘅一定要捧場啦。
不過，唔係咁多議員都打算聖誕外遊，工聯會黃國健話今年好多聖誕團一早爆滿，所以乾脆留喺香港休息，為1月復會做好準備。民建聯葉國謙就話會返內地一兩日，因為立法會運作唔理想，有議員拉布，希望可以趁機休息同行開吓，自己亦可以清靜吓。
黃國健卿姐留港叉電
公民黨黨魁梁家傑同民主黨主席劉慧卿都話會留港，傑哥屋企人返哂香港，所以全家留港過聖誕，卿姐亦留港叉電，佢笑住話充足睡眠、飲食均衡，時刻保持開朗，令佢睇落都精神奕奕。
更多港聞
相關新聞
