玩弄賽制睇定嚟食 葡軍不勝咪葡萄

玩弄賽制睇定嚟食葡軍不勝咪葡萄

[2016.06.24] 發表

唔好奇怪或以為睇錯，柏高今日要講美洲國家盃；但亦並非要講正在美國舉行的多餘百周年紀念版，而是重提2011年那一屆，巴拉圭一場不勝，卻獲亞軍而回。撇開真．高層決策錯誤玩謝基層，葡萄牙3和出線，畢竟付過應該付出的努力。假如他們真的一路殺入決賽，天意如此，也沒有什麼好葡萄的。

與南美/巴西淵源甚深的葡萄牙，簡直是歐洲版巴拉圭，就算4年或6年沒看過他們的比賽，也有機會估中大部分主力人腳。他們未必是非常青黃不接，但實在抱殘守缺得可以，因此把葡軍視為實力分子的人，要不是齋捧基斯坦奴朗拿度而對足球一無所知，要不就是刻意誤導觀眾(甚至自己)搵嘢嚟鬧。教練費蘭度山度士針對中鋒乏人，搞搞新意思用C朗及拿尼名為雙鋒實為雙翼的怪陣，強攻乏力理所當然；最後一仗C朗較似中鋒了，但也要到下半場加強中場活力支援，才發揮到C朗禁區內的移動和頭槌威力。

3分是否值得出線，等如今天仍問李斯特城是否值得贏英超。今屆開賽以來，柏高不止一次論及賽制問題，歐洲足協好大喜功或政治酬庸增加隊數，幾乎必定有第3名球隊是3分出線，葡軍更是守尾門睇定嚟食，贏得失球都係贏，倘換上是阿爾巴尼亞3和晉級，肯定大家會拍爛手掌，雙重標準莫過於此。

能夠3度落後3度扳平，葡軍鬥志可嘉，真正叫柏高失望的倒是最後十多分鐘已與匈牙利心有靈犀地內定打和等收工，但這也是差勁賽制帶來差勁後果。若然另一邊廂的冰島不是絕殺奧地利，葡軍已跌入死亡下線，但說好運又未必。根據歷史，葡國食硬英格蘭；再講，上述指葡軍無中鋒難強攻，分組賽遇上3支所謂下風球隊特別難踢，但在淘汰賽位置逆轉變「弱旅」，反而有利葡軍打反擊也說不定。現在於上線，16強即撼克羅地亞，對方實力四平八穩不在話下，葡軍也恐陷入角色設定迷思。當然，如果一心效法巴拉圭靠互射12碼搵食，就冇乜好煩惱了。