【明報專訊】海洋公園剛剛換咗行政總裁，卸下重擔嘅苗樂文(Tom)不改「工作狂」本色，噚日同傳媒飯敘時，就開到聲話享受工作，個人好難慢落嚟，所以只休息兩個月，9月就會正式開新工做顧問，第一名大客就係有12年感情嘅舊東家——海洋公園喇！佢透露海洋公園嚟緊會有大計，大家有機會唔使買飛入園，就可以喺園內餐廳食晚餐。詳情佢就賣關子，園方最快下周公布。 Tom同現任CEO李繩宗除咗同樣熱愛工作，仲一樣咁注重健康。Tom話，幾年前有個同事心臟唔舒服，令佢覺得要鼓勵吓大家維持良好生活習慣，於是當聖誕禮物，送運動手帶畀管理層同事，咁就可以時刻留意有無足夠運動，好似Tom咁，佢每日平均行兩萬步咁多！話口未完，同場嘅營銷執行總監梁啟誠就攞出隨身手帶，噚日朝早到食午餐行咗大約4000步。 Tom做咗12年CEO，大家都好唔捨得佢離職，仲設計咗個「卡通版苗樂文」做歡送禮物，極有神髓！畫中另一主角威威獅令噚日都有現身同佢合照(圖)。向來玩得嘅Tom仲預告今年萬聖節「哈囉喂」會繼續扮鬼扮馬，小心唔好畀佢嚇親！
|
| |
| |
;){kind=small}
