為上庭趕唔切提議 小麗遭墟市支持者抱怨
[2016.12.23] 發表
【明報專訊】聖誕元旦將至，立法會會期暫告一段落，不過今屆議員中，劉小麗可謂係當中嘅「黑仔王」，唔止官司纏身，又經常畀人發現「甩轆」，上個禮拜大會本身安排佢提出嘅「訂立全港性的長遠墟市政策」議案，點知最後因自己要上庭，趕唔切返立法會提出，白白浪費咗個大好機會。
其實上個禮拜四朝早，小麗已預估時間緊張，預先將佢嘅墟市政策議案押後，先討論教育界葉建源提出嘅「下任教育局局長須具備的條件」。點知在場民主派發言嘅人數唔夠，點拖都無得「等埋小麗」。
Emily聽聞，今次錯過動議，令到小麗一班墟市小販支持者都有怨言，仲一度諗住網上改圖鬧小麗。但經一事長一智，前日立法會墟市事宜小組委員會嘅公聽會就好齊人，仲大比數通過3項無約束力動議，包括要求食環署安排喺年宵市場結束後原址辦熟食墟市，令佢成功𧨾番班支持者。立法會議員想提出議案要經過抽籤，機會唔係次次都有。所以無辦法喺立法會大會留個紀錄，睇來小麗都欲哭無淚。
更多港聞
相關新聞
