林鄭新攻勢 街頭橫額宣傳 「薯仔」拍片撐曾俊華 讚乜都識

林鄭新攻勢街頭橫額宣傳「薯仔」拍片撐曾俊華讚乜都識

[2017.03.10] 發表

【明報專訊】距離投票日愈黎愈近，各特首候選人亦開始加強宣傳攻勢。Emily噚日就喺油麻地等多區都見到林鄭月娥嘅競選橫額，上面寫有「增加供應『綠置居』」同「促進青年議政、論政、參政」等多項政綱。林太facebook又上載兩條短片，其中一條講佢去藍屋同灣仔街市參觀。林太話，出生到21歲一直住喺灣仔，學校亦喺灣仔，所以對灣仔充滿感情。另一條片播出競選辦資深顧問林建岳撐佢嘅片段，岳少大讚林太負責嘅項目有統籌能力、肯學肯改善，仲講笑話知道林太用八達通已經熟手咗。

林鄭灣仔落區自言老街坊

另一候選人曾俊華亦喺facebook上載短片，搵大仔曾雕龍亮相支持。曾雕龍喺短片入面大讚爸爸係超人，話佢乜都識，做事專注唔會半途而廢。曾雕龍又憶述一家四口1982年由美國返港，佢問爸爸點解回流，曾俊華就話自己係中國人，想貢獻香港，又希望仔女學好中文同中國文化。

曾雕龍認為香港需要一個有經驗、畀到市民信心嘅人，所以決定支持爸爸參選。曾俊華就話自己甚少過問個仔嘅工作，之後個仔投身酒店業，成功幫唔同食肆「摘星」，令佢深感安慰。曾俊華話選戰開始後，太太照顧佢嘅飲食，個仔亦做軍師，希望佢能為香港「摘星」，佢對家人嘅支持無言感激。