被指政治因素無入閣 蘇敬恆﹕多謝關心
[2017.10.02] 發表
【明報專訊】政府問責班子，目前尚餘財政司長政治助理、食物及衛生局政治助理兩個位仍然懸空，多間傳媒早前報道，食衛局政助原擬由港台節目《城市論壇》主持蘇敬恆出任，但遭建制派反對而觸礁；蘇敬恆噚日繼續主持《城市論壇》，佢節目後接受訪問時無正面回應有關說法，只係話多謝大家關心其去向，希望政府盡快填補問責團隊中仍有嘅兩個空缺。
對於特首林鄭月娥講過用人唯才，但報道就話蘇係因政治因素未能入閣，蘇敬恆話希望特首會落實政綱、「多啲包容」，令年輕人有多啲議政、論政嘅機會。
喺城壇中觀眾發言環節，有觀眾話蘇敬恆係因為中聯辦干預所以入唔到政府，蘇喺節目度未有回應，佢之後話「可能有啲朋友睇咗一啲報道」，無論如何希望政府盡快填補有關空缺，對政府、社會都係好事。佢又話自己一直係港台員工，如果一切無改變，未來會繼續主持城壇。
食衛局長陳肇始噚日出席國慶酒會時就被記者問到係咪要重新物色政助，佢未有回應，至於蘇敬恆係咪唔會有機會獲任命，陳肇始話唔會回應，有消息就會公布。
更多港聞
【明報專訊】國慶加上周三中秋節，呢個星期有兩日公眾假期，而多個慶祝中秋同回歸20周年活動同時舉行，包括兩項舞火龍活動、多個中秋節嘉年華及一個...
詳情
相關新聞
