明珠台播 無綫新聞下年有手語
[2017.10.04] 發表
【明報專訊】聽障社群過去爭取電視手語傳譯新聞多年，終於迎來好消息。通訊事務管理局噚日公布，話根據無綫嘅免費電視牌照，指示無綫要由明年7月3號開始，每日喺明珠台播放提供唔少於15分鐘手語傳譯嘅粵語新聞節目，時間要喺每日下晝6點至午夜12點之間，並要提供繁體中文字幕。
通訊局話，留意到聽障人士對手語傳譯新聞節目嘅需求日增，所以喺處理無綫續牌時，要求無綫實施手語規定，但無綫當時擔心未必有足夠嘅合資格手語傳譯員，同埋未必確保到手語傳譯新聞嘅內容準確無誤；之後通訊局成立咗專責小組研究，最終同意無綫喺明珠台，而唔係翡翠台提供手語傳譯新聞節目，並且同意如果手語新聞節目入面，某啲情况若受到技術限制而無法提供手語傳譯，就可獲得豁免；同時亦要求無綫提供嘅手語傳譯必須清晰可辨，令觀眾清楚睇到。
無綫回覆話，通訊局宣布嘅安排係經商討後嘅結果，有關播放詳情將會喺落實後公布。多個聽障人士團體發表聯署聲明話歡迎通訊局嘅決定，但就要求手語新聞節目要喺每晚8點至9點半之間固定時間播放、手語傳譯視窗佔熒幕不小於1/6面積，以及將節目上載網頁方便重溫等。
更多港聞
【明報專訊】今屆立法會已經過咗一年，噚日民建聯幾個議會新丁張國鈞、周浩鼎（Holden）、柯創盛、劉國勳同記者茶敘，總結經驗展望將來。早前捲...
詳情
相關新聞
