【明報專訊】支聯會近日公開招聘全職幹事，請人執行、宣傳該會各項活動，構思、籌辦項目相關活動及宣傳工作等，要求應徵者善於溝通、積極主動、富責任心及團隊精神，間中須戶外工作等，如果有意應徵，除咗要提供履歷等資料外，亦要撰寫〈六四與香港青年何干？〉 為題嘅300字短文。Emily問過支聯會副主席蔡耀昌，佢透露呢個算係新職位，因為明年六四30周年，希望舉辦一系列活動。 蔡耀昌話，支聯會有一個半職幹事，所以申請人經驗唔夠都問題唔大，只要有合適人選，無論咩經驗嘅都會考慮。 佢透露現時支聯會內已開始規劃六四30周年嘅活動，未來會多與唔同團體、界別組織聯繫，希望除咗支聯會外，其他團體都會舉辦六四相關活動，令活動更多元化，笑言佢哋都搲爆頭，希望有新思維搞活動。 蔡耀昌透露，六四30周年嘅活動內容主要想「面向新一代」，形容30周年希望有一個階段總結同展望，例如中國近年嘅變化、平反六四嘅工作應該點行落去等，希望今年底會定出30周年嘅主題。 永久紀念館「睇緊舖」 Emily亦關心支聯會希望設永久六四紀念館嘅進度，原來蔡耀昌同Emily講電話期間正喺區內「睇緊舖」，佢話希望30周年之前可以有紀念館畀人參觀，所以呢件事都幾急，希望一兩個月內有眉目；又指目前樓價貴，都會考慮租住先，咁彈性就會大啲。
|
| |
| |
