【明報專訊】香港眾志秘書長黃之鋒住喺南區海怡半島前後足足14年，近兩年擔任當區社區幹事。黃之鋒爸爸、本身係海怡業主嘅黃偉明，近日就參選海怡業委會，佢一旦當選就會授權之鋒參與業委會工作，兩父子就可以「拍住上」參與會議、為居民發聲。 阿爸如當選 會授權阿仔開會 之鋒父子檔嘅參選政綱相當詳細，包括跟進港燈酒店施工時間表、反對削減巴士班次等，佢同Emily講，重點政綱包括喺海怡半島推動售賣環保回收物料、補貼管理開支，仲話太古城做舊衣回收5年，淨收入已經多達98萬元，睇?佢都做足功課服務街坊呀。 今次之鋒參選都可謂困難重重，一來佢要挑戰嘅係前區議員羅錦洪，二來近日有街坊廣發公開信，質疑點解要令業委會成為戰場，甚至話「海怡年青家庭絕大多數不想子女變成黃之鋒」。之鋒向Emily強調，參選唔係政治陣營比併，係希望參考其他屋苑管治嘅成功經驗，令海怡變得更好，「我至少相信(如)自己的社區(都)做不好，遑論在更多的問題上為市民打拼」。 推動屋苑售賣環保回收物料 選舉周四(18號)舉行，之鋒話今次參選都算充滿挑戰，會審慎應對。係咪為下年選區議會鋪路？佢話太過遙遠，希望先入業委會，推動屋苑環保措施。
|
| |
| |
;){kind=small}
