【明報專訊】噚日港鐵4條線出現信號故障，影響巴士幾乎「迫爆」，人龍處處，唔少打工仔大受影響，返工遲大到，原來連專門檢討香港巴士政策嘅香港專營巴士服務獨立檢討委員會成員，都因為交通混亂遲到。 經過5個月時間，噚日委員會終於嚟到最後一場聽證會，但到咗10點、即係委員會原定開會時間，委員會職員宣布，有委員因為遇到嚴重交通擠塞，聽證會要延遲20分鐘先開始。 委員會主席倫明高之後喺開場時話，噚日唔少人都遇到交通困難，「很諷刺地，委員會正正是要處理𠵱個問題，但羅教授(委員會成員羅康錦)都遇到同樣嘅(交通)困難」。 陳美寶不答會否檢討港鐵罰款機制 噚日嘅聽證會係運輸署作供，Emily都趁機會問運輸署長陳美寶，會唔會檢討港鐵服務延誤嘅罰款機制，佢就笑而不語，無答到。
|
| |
| |
