有新移民為慳錢選擇自己搬屋，叫朋友幫手，一車一車慢慢搬，表面上似乎無成本，但搬屋時間拉長，請食飯還人情債又變成另一筆開支。搬屋拖了三日，飯局就請足三晚，結果發現比起請搬屋公司仲貴。計落條數先發現，原來「人情」都是一種成本，只不過不是即時付費。
搬屋最考體力，年輕時一箱箱慢慢搬、一張床自己抬，捱幾日都仲頂得住。但人到中年，體力早就不是從前。傢俬不是重了，而是條腰真的頂唔順。40歲打後，搬完一轉要休息幾日，腰酸背痛唔講得笑。
每年夏天、開學前後，搬屋需求爆燈，想搵間可靠啲嘅搬屋公司，難度堪比搶演唱會飛。有市民搬屋公司搵了三間先搵到幫手，價錢仲比上年貴三成。
搬屋搵朋友不會慳到錢
吳先生的經歷是一場「慳錢反變貴」的典型例子。他剛完成由烈治文山搬往士嘉堡的搬遷，原本打算節省開支，自行租車搬屋。
「我做足功課，U-Haul租車加油錢都唔使$180。」但吳先生忽略了新居所公寓需要預約搬運電梯。「管理處話得返朝早8點至12點，但U-Haul最近分店最早都要10點先開門。時間根本不夠用。」
搬屋大計無法如期實行，朋友於是提議：「不如我幫你用私家車慢慢搬啦。」於是展開一場為期三日的螞蟻搬家，每天找一兩位朋友幫忙，來回穿梭烈治文山與士嘉堡。
「朋友不收費，但我都不好意思唔請食飯，一餐六、七十元，三日都有二百幾。」再加上用時過長，浪費體力，他最後總結：「原來貪平搵朋友搬屋可能仲貴。」
旺季想請搬屋公司不容易
A小姐原本居於North York，因工作調動計劃搬到多倫多市中心的Studio單位。她一早就從朋友手上拿到搬屋公司聯絡人，滿心以為安排妥當，怎料電話打了三次都無人接聽。期間雖然收到一次回覆，但真正想確定搬屋日期時，對方卻再度失聯。
無奈之下，她改為聯絡自己以前曾經用過的搬屋公司，誰知對方同樣沒回音。直到第二位朋友介紹了一間華人搬屋公司，終於成功預約。「嗰間公司肯覆我，我先至安心得落。」
她指出，選擇找搬屋公司主要是因為傢俬體積大，「尤其是床褥同沙發，要自己搬根本唔現實。」最終，她請來兩位搬運工人，兩小時內完成搬屋，費用連小費、稅金大約在600元左右。
不過，她亦提到，對方當日並未主動提供任何包裝協助。「所有物件我自己一早pack好，甚至張床都係我自己包膠毯包好。他們就只係搬上搬落。」她直言，整體體驗不差，但服務仍有提升空間。
這並非她第一次搬屋。「自從三年前嚟咗加拿大，每年都搬一次。今年最明顯係價錢升得快，上年一個鐘收$150，今次已經去到$200。」
年紀漸長自行搬屋會腰骨痛
李先生作為一名剛過40歲的港人，他坦言，年輕時曾用「螞蟻搬家」方式，自行搬運幾袋幾袋物件，但這次他不敢再搏命：「搬完真係會腰骨痛幾日，不是開玩笑。」
他這次決定一開始就聘請搬屋公司。「除咗年紀大咗之外，其實我更擔心係臨時放飛機。」他解釋，近年坊間經常聽到有搬屋公司在當日失聯或突然取消服務，結果搞到一頭煙。
為了保障自己，他堅持至少透過電郵或短訊與對方留下書面記錄。「收費、時間、幾多個工人，寫清楚。白紙黑字就算唔係正式合約，到時真係出事都有證據。」
他說，自己見過太多人吃虧，最後只能上網發帖投訴。「但無紀錄，公眾又唔一定信你。你寫Review，佢照樣繼續營業，你就氣死都無用。」
搬屋公司：如有損毀 每磅賠一元
Francis是多倫多一間搬屋公司的負責人，有超過四十年經驗。他指，目前多倫多搬屋公司收費市價約為每小時$160左右，而旺季期間會貴多少少，而且，很多公司都要最低消費四小時起跳，如是者，計上小費和稅，每次搬屋都要過千元。Francis補充，費用指的是已包括三位搬運工人，並會為傢俬提供基本包裝。「有防撞毯、捆繩、包角膠邊，全部都係標準裝備。」
Francis自豪地表示，自己入行多年，從來未打爛過客人傢俬。「有些公司搬電視、搬沙發，一唔小心就整花。不是技術唔夠，是唔夠細心。」他坦言：「搬屋不需什麼高深技術，靠的是體力、小心、夠經驗。」
但他也坦承，不少客人對保險條款並不清楚。「根據北美搬屋公司的行規，如果真的損壞了，就每磅賠一元。但如果傢俬真是屬於較貴，最好就買件對件保險。這樣撞爛了沙發，就照價賠返一張。」
他形容搬屋旺季時需求急升，亦難免有公司臨時出問題。「其實最緊要是客人不要臨時臨急，早點預約、早點傾清楚，找可靠公司，那就雙方都安心。」
租客保險已經包了搬屋傢俬運送
不少人在搬屋時都會擔心傢俬損毀：沙發撞花、電視螢幕碎裂、木櫃磕崩角……於是會考慮是否要額外購買搬運保險。不過，有保險經紀指出，對於多數已在加拿大定居的住戶而言，其實不一定需要額外花錢買保險，「因為你屋企原本買的租客保險（Tenant Insurance），多數已經包咗傢俬搬運途中發生的損壞。」
即使遇上沙發刮花、櫃門撞崩等情況，也未必人人都適合報保險索償。保險經紀提醒，最常見的關鍵考慮有兩個：
墊底費（Deductible）高唔高？
「如果你保單設定是$500或$1,000墊底費，意思是你損失金額要高過呢個數先至可以Claim。」例如，一張刮花的沙發原價$600，可能報了都唔划算。
保額種類：
Replacement Cost（原價替換）： 保險會賠返一張全新的同款傢俬。
Actual Cash Value（實際現金價值）： 只會按你張舊沙發的折舊價值賠償，年數越長、折舊越多，賠得自然越少。
經紀補充：「好多市民簽保單時都無理會這點，到要賠償時，才發現不是賠返一件新的傢俱，仲要再貼錢買返張新梳化。」
至於剛到埗的新移民，如果未及時購買租客保險或未開戶口，經紀建議可以選擇購買一份短期搬運保險作為過渡安排，以防萬一，尤其是當帶來的行李或傢俬中有價值物品，例如高價電子產品或定制傢具。
