【明報專訊】除咗七一遊行，六四燭光晚會亦係泛民團體籌款嘅重要場合，支聯會一年一度只喺呢個地方籌款，加上出席六四晚會嘅人都多數支持支聯會工作，支聯會今年籌到134萬，喺一眾籌款團體中，成為「吸金」大贏家都係理所當然。不過，支聯會上年籌到170幾萬，今年少咗，李卓人就話今年出席六四晚會人數少咗，籌款數字下跌都正常。 學民街站籌33萬 學民思潮前日擺街站一度畀警方阻撓，但無損學生嘅吸金能力，佢哋總共籌得33萬港幣同大約2000蚊嘅外幣，而印製嘅幾萬張宣傳單張，亦全數派出。學民仔話所有捐款會用喺印刷文宣同添置物資上。學民舊年籌得37萬元，今年都跌咗少少。 雖然支聯會籌款下跌，但係政黨吸金力都勁過舊年，好似公民黨今年賣六四親子T恤、file等物品籌到接近30萬，比起舊年約21萬多咗幾萬。向來多官司纏身令佢哋開支唔細嘅社民連，今年就籌到25萬，比舊年多咗1萬。工黨主席李卓人六四全日為支聯會籌款，但無阻工黨吸金，今年籌到9萬蚊，多咗成一倍。 至於民主黨，籌款數字係0，因為已故支聯會主席司徒華當年規定，民主黨喺六四應該為支聯會籌款，呢個傳統至今無變，所以六四當日民主黨成員叫咪、賣嘢，籌到嘅錢全部都係畀支聯會嘅。
|
| |
| |
;){kind=small}
;)
