【明報專訊】香港人最鍾意食海鮮，有冇諗過海鮮都可以食得環保？世界自然基金會(WWF)月底推出「環保海鮮周」，參與餐廳數目比上次搞同類活動大大增加，其中美心、翠華都有份參與。 為咗令市民食得更環保，WWF由6月27號到7月5號會舉行「環保海鮮周」，同26間餐廳、合共112間分店合作推出環保海鮮餐單，由中餐、西餐到快餐店茶餐廳都有，WWF嘅App同Openrice都會列出邊啲餐廳有得食。WWF對上一次搞環保海鮮周已經係2011年嘅事，當時只得9間位於SOHO區嘅餐廳參加，項目主任張亦敏都話呢個係大進步。 WWF由2007年開始提出「環保海鮮」概念，根據海鮮嘅品種、養殖方法同對生態嘅影響，制訂紅黃綠三級制，當中綠色「建議進食」就係環保海鮮，佢哋來自管理妥善嘅漁業同養殖場，包括設發牌制度、休漁期同禁捕區等，對生態影響細，所以建議市民食用，蠔、龍蝦同蜆都屬於環保海鮮。另一方面，如果海鮮正值產卵季節，都應該避免食用，一來產卵季節肉質會比較差，二來食到人哋冇得繁殖，分分鐘會絕種㗎。
|
| |
| |
;){kind=small}
;)
