【明報專訊】港澳辦前副主任、全國港澳研究會會長陳佐洱前日講「去中國化」死灰復燃等言論，引起社會關注，噚日佢再會見傳媒時又講到本土問題，話家國情懷與本土唔可以分開，更加引用抗美援朝電影《上甘嶺》插曲《我的祖國》嘅歌詞去講，陳佐洱話呢首歌「常聽常覺得好聽」。相信讀者未必識呢首歌，不過其實首歌都好紅，國家主席習近平太太彭麗媛翻唱過，連經典港產片《表姐，你好嘢》入面，飾演女公安嘅鄭裕玲都唱過㗎。 陳佐洱噚日講本土同本國唔可以分離，仲話內地有首著名歌曲，唱咗幾十年，「常唱常新、常聽常覺得好聽」，然後仲引述歌曲嘅頭三句歌詞𠻹。其實現場唔少記者聽到佢講有首歌時，都好期待陳佐洱唱畀大家聽，可惜佢只係讀出歌詞。 抗美電影插曲 紅人常翻唱 睇番資料，《上甘嶺》取材自1950年代初抗美援朝嘅「上甘嶺戰役」，講述中共志願軍死守陣地嘅故事。插曲《我的祖國》由劉熾作曲、喬羽填詞，郭蘭英主唱，後來成為經典紅歌，彭麗媛、宋祖英、韓紅等人都曾經翻唱。 歌詞頭幾句，係「一條大河波浪寬，風吹稻花香兩岸，我家就在岸上住，聽慣了艄公的號子，看慣了船上的白帆，這是美麗的祖國，是我生長的地方……」唔知大家跟住唱時，會唔會表現激動流淚？
|
| |
| |
;){kind=small}
;)
