【明報專訊】三八婦女節將至，民建聯立法會三女將李慧琼(Starry)、蔣麗芸(Ann姐)及葛珮帆(EQ)噚日準備咗小盆栽，向立法會內嘅女士「獻花」。EQ話，立法會秘書處職員、議員、助理，加埋總共有385名女士，為咗感謝秘書處陪伴佢哋「有衝擊、有拉布」嘅日子，特別送上呢份心意。個盆栽係家樂花，寓意「家家樂樂」。Ann姐就祝願「所有女士開心，男士識做」，被問到有無期待老公禮物，佢就好甜蜜咁講，健康就最開心。 盆栽貼3人大頭相 今屆立法會有11名女議員，Starry話，次次都有人問，點樣可以提高立法會女性議員比例。佢認為，最緊要係背後男人要支持，唔介意太太係公眾人物，又要幫手做埋媽媽嘅角色。 佢哋遲啲會將盆栽送到每個立法會女議員嘅辦公室，不過盆栽上就貼住佢哋三人嘅大頭相，咁嘅賣相，唔知大家會聯想到乜嘢呢？
|
| |
| |
;){kind=small}
;)
