【明報專訊】特首梁振英女兒梁頌昕引發嘅行李風波，令好耐無現身嘅前港區人大代表「飛天豬」朱幼麟現身。佢喺前日空總集會上話，原來當日前線職員聽梁特電話聽到流眼淚。噚日佢同「愛港之聲」召集人高達斌一齊上電台節目時金句連連，仲「狙擊」高達斌，連主持人都控制唔到！ 高達斌：一宗兩宗叫「濫」咩？ 朱幼麟喺節目中重申，以佢所知，有5至6個職員喺現場目擊事件，但到𠵱家都無人夠膽出聲，佢話咁樣令佢更懷疑有人濫用特權。高達斌回應話﹕「一宗兩宗呢啲叫『濫』咩？經常性先叫『濫』嘛。」朱幼麟忍唔住連環炮轟反駁﹕「如果我一次兩次強姦一個人，就唔使計啦呀嘛。你啲價值觀真係嚇死人，你自己講自己愛國，如果要愛國，首先要自己有水平，你係侮辱緊愛國人士。」 朱幼麟：你幫愛國幫倒忙 主持人插嘴想㩒停朱幼麟都無能為力，高達斌就寂靜無聲，之後主持問佢問題先講番嘢，話憑特首聲明睇到佢冇濫權，呢個時候朱幼麟反問佢﹕「你信咩？你自己無腦㗎咩？」老人家之後話高達斌「你幫愛國幫倒忙」、「做愛國愛港人士首先要確保自己唔係垃圾」，聲聲入耳，但高達斌就無回應，只係話如果涉事職員無現身，件事就係「謠言」、係妖言惑眾。
|
| |
| |
;)
