【明報專訊】今年七一係香港回歸20周年，唔少地區人士都特登製作傳統竹棚花牌，仲放喺大馬路旁邊，上面主要都係寫住「熱烈歡迎國家主席習近平視察香港」、「慶祝香港回歸祖國二十周年」、「恭賀林鄭月娥榮任香港特別行政區行政長官」之類嘅字句。不過有讀者就報料話，見到國旗同區旗嘅擺位左右調轉咗，話「呢次真係擦錯鞋」。 Emily睇番政府禮賓處網站，若果喺建築物外面展示國旗及區旗，喺確定該建築物嘅左、右嘅時候，要人立建築物前，面向該建築物前門時嘅左、右為準。但呢一批花牌就左右調轉咗。 問番有份製作花牌嘅十八鄉鄉事委員會主席梁福元，佢話知道國旗區旗擺法有規有矩，事先已經問過意見，仲叫咗造花牌嘅人鄭重留意，家下要再研究下，若果真係有錯就會改番。Emily見到由元朗新田、十八鄉以至西貢坑口都有呢類巨型花牌，福元哥就話唔係鄉議局統一製作，只係個別鄉事自發，仲多謝讀者嘅提醒。
|
| |
| |
;){kind=small}
;)
