【明報專訊】特首林鄭月娥仍未完全埋班，未公布副局、政助及新聞統籌專員(IC)人選，而前任IC馮煒光任內就幾惹火，不時喺社交網站同專欄向民主派「開火」，但林鄭噚日同傳媒聚會時就話，IC應該保持低調，幫助特首同特首辦主任嘅統籌工作，同公眾保持良好關係，「本身唔應該玩facebook」，亦唔應該隔空對罵。咁IC一職請到人未呢？林太就話要問特首辦主任陳國基(KK)，而KK話未請到，但笑住問現場記者「有無推薦？」 未請到新聞專員 問「有無推薦？」 林鄭就任後噚日中午同記者聚會，聚會地點係位於上環嘅政府新聞處會議廳，會議廳位於25樓，玻璃窗有九龍區無敵海景。林鄭就話，𠵱家政府搞記者會或者私人機構搞大型活動，成日用港島區風景相做背景佈置，但其實九龍區海岸線都有城市特色，過幾年西九有M+博物館、高鐵站，加上部分新落成的高廈，都係好靚嘅風景。 倡新聞處會議廳牆畫換九龍海景 新任特首又當場向新聞處長黃智祖提出建議，話會議廳內嘅港島海岸風景牆畫，過兩年可以考慮改用九龍海岸風景照。 另外，林鄭近日出席不同場合，換衫頻頻，佢嘅facebook噚晚就貼文，話近日傳媒對佢嘅衣著都好有興趣，於是上載前日下晝活動嘅相，話眼利嘅會留意到相中佢著嘅藍色旗袍，已經唔係前日朝早上出席立法會答問大會嘅蝴蝶旗袍，但藍色外褸則係同一件。佢仲話﹕「衫唔使好多，識配搭就得啦！」
|
| |
| |
;){kind=small}
;)
