為醫護打氣 大輝倡派劉華演唱會飛
[2019.01.26] 發表
【明報專訊】近日流感爆發，公立醫院前線醫護人員做到冇停手，醫管局搵嚟多名藝人打氣，但反而被批評離地。全國政協委員林大輝噚日都批評有關做法，仲建議如果派劉德華演唱會飛，就真係士氣大振啦。唔知醫管局會唔會採納呢？
話搵楊千嬅講兩句反令士氣低落
林大輝同傳媒午宴時，講起近日醫管局搵藝人拍片，佢認為搵楊千嬅講兩句唔會增加醫護人員士氣，反而會令佢哋士氣低落，如果派劉德華演唱會飛，就真係幫醫護人員打氣啦；如果派兩張飛，直情士氣大振𠻹呀。不過，劉德華早前因為染上流感，演唱會被迫腰斬，本身想申請今年底嘅紅館跨年檔期，但結果攞唔到場地，似乎林大輝嘅建議短期內都難以實現啦。
「派錢派到畀人鬧都幾失敗」
政府「關愛共享計劃」派發4000蚊，但就被批評安排混亂，林大輝就忍唔住話「派錢派到畀人鬧都幾失敗」，認為執行上冇諗清楚。被問到點解政府每次派錢都有市民不滿，大輝就話因為次次派錢都唔同特首，如果嚟緊特首林鄭月娥連任，相信就可以汲取經驗派錢，換來市民歡呼聲。仲有3年先到特首選舉，咁快就撐林鄭連任？大輝就笑笑口問：「我話唔支持有人信咩？」翻查資料，上次特首選舉，林大輝係林太競選辦嘅主席團成員。
更多港聞
相關新聞
