【明報專訊】聖誕節將至，香港天主教正義和平委員會同社福界議員邵家臻，發起「給手足寫聖誕卡」行動，呼籲教友或公眾人士一同參與，等在囚「手足」唔會感到孤單。 曾受牢獄滋味嘅阿臻話，接近6000人因參與反修例、反警暴運動被捕。根據邵家臻議員辦事處統計，目前至少有80名手足被還押喺荔枝角收押所，阿臻話佢哋唯一嘅樂事，可能係閱讀外界畀佢哋嘅書信或心意卡。除咗因反修例被捕嘅人，阿臻話仲有因佔中而入獄嘅陳健民，話佢哋會繼續代收代轉「為健民打氣」信件。 有意送上祝福者，可把書信郵寄到「香港西灣河耀興道72號聖十字架中心6/F(香港天主教正義和平委員會)」代收，須註明相關書信係寄畀陳健民還是畀還押喺荔枝角拘留所嘅手足，正委會會代為轉寄。 正委會又提醒有心人，郵寄信件必須付足郵費，信內唔可以包含色情、人身攻擊內容及粗言穢語；如果寄聖誕卡、慰問卡等，卡上唔可以有3D圖案、閃粉，話監獄只接受平面設計嘅賀卡。
|
| |
| |
;)
