【Emily】綠惜地球總幹事劉祉鋒榮休 憾垃圾未徵費
[2025.08.30] 發表
【明報專訊】經常為環保議題發聲嘅綠惜地球總幹事劉祉鋒(Edwin)聽日榮休，由副總幹事黃子勁接棒。Edwin早排同傳媒茶敘，回顧36年喺環保界日子，提到最遺憾嘅事莫過於醞釀咗20年嘅垃圾徵費，法例通過一年仍未落實，亦睇唔到政府積極向市民講解徵費執行細節。
昔以數據說服官員 今約見面都難
Edwin話推動環保一定要以事實為基礎，仲要由良心出發，市民先有共鳴和認同。佢話舊年好多市民唔明點解要推垃圾徵費，佢就四出去各種場合講解，有市民鬧佢為政策護航，同事叫佢唔好講，但佢話憑良心講嘢，應該堅持，又話團隊不時評論環保政策，係希望政策效果更彰顯。
Edwin早喺1989年推動學校回收廢紙，1993年去屋邨推分類回收，仲打造咗幾個回收桶畀居民體驗分類，而政府直到1998年先推出第一代三色桶。佢話過去環團推動環保政策，會盡量以事實同研究數據說服官員，但𠵱家想約局長見面都難。
劉祉鋒1989年加入地球之友，2015年離開，翌年創辦綠惜地球。佢話兩年前已以健康理由向董事局請辭，日後仍會繼續以綠惜地球創辦人身分為環保發聲。
更多港聞
【Emily】警首部微短劇播出 一哥：學堂回憶湧現
【明報專訊】警方推出首部微短劇《郭Sir！學警A班到齊！》，噚日及下周二（9月2日）分別喺警方抖音帳戶及YouTube頻道分集播出。呢套微短... 詳情相關新聞
