【明報專訊】警察公共關係科噚日同傳媒行家聚會，「4點鐘許sir」許鎮德同Emily及行家講起，警隊知道與社區互動及發放資訊要多樣化，繼早前嘅YouTube頻道後，今年內會推出警隊facebook專頁。 發放大事資訊相片 許sir話，facebook專頁會好似「大嘥鬼」咁有個「吉祥物」做代表，警隊已經設計咗卡通人物，至於卡通人物個樣會似一哥盧偉聰還是許sir多啲，讀者就要拭目以待。內容方面，警方把握喺罪案現場嘅「第一手資訊」優勢，發放一啲重大事故嘅事態資訊或相片。未來會專門負責搞好警方social media嘅警司謝振中話，會仿效外國警隊fb，post吓警隊嘅溫情故事。 料非24小時運作 禁粗口 警方有數個專人負責fb運作，初步構思唔使24小時操作。至於網上罵戰不斷，咁多惡意留言警隊又會點應付？許sir就話當然唔會容許粗言穢語、淫褻不雅等內容，至於人身攻擊等中傷行為，就要視乎情况，唔知到時會唔會見到一哥或者許sir，好似王維基咁用真名facebook回覆網民呢？
|
| |
| |
