謝賢扶行樓梯笑曾江做戲 爆粗窒修哥無有怕 《4個小生》花絮片曝光
【明報專訊】無綫節目《4個小生去旅行》日前記者會發生79歲謝賢(四哥)怒摑80歲曾江，83歲胡楓(修哥)護曾江無辜中招被打甩眼鏡事件，引起哄動及爭議，究竟是真的拍出火還是宣傳手法？不論真與假已大收宣傳之效，無綫還趁機在節目及官方facebook借事件「抽水」。近日fb再出現一個名為「4個小生去旅行－修哥開嘅」專頁，上載多條幕後拍攝花絮片，不少由修哥揸機，相信是工作人員開設。當中有他們互窒的對話，四哥選條易行的樓梯給曾江，笑窒他不用再作狀做戲，又開玩笑向修哥爆粗。
要求送面毛 修哥拒絕：過主啦
fb花絮片中，其中一條「謝先生份人真係斯文到冇朋友」，由修哥揸機拍攝站在坦克車上的四哥，但被四哥窒他：「唔係叫你影人呀！影㗎車呀！」修哥反駁：「唔係影人，重金禮聘你嚟做咩呀？」四哥手指修哥爆出一句：「碌X咁！」旁邊工作人員即時說：「唔好講呢啲，出街㗎！上網㗎！一陣又話你粗口四喇！」四哥無有怕話：「驚咩呀！」老友鬼鬼的四哥與修哥在另一條片中，四哥要求修哥送面上一條最長最鬈的毛給他，修哥笑笑口拒絕：「過主啦！」
「嗰條樓梯好行呀 行番正常畀人睇」
四哥日前爆曾江借腳痛幾乎全程坐輪椅，花絮片中見他看似關心對曾江說：「Ken呀！嗰條樓梯好行呀！你唔使做樣，做到好難行咁呀！」然後拉着曾江行上去再說：「行番正常畀人睇，佢無作狀、做戲，行得幾正！」其間亦有扶一扶曾江。
闖軍事重地 曾江搭四哥膊有講有笑
《4個小生去旅行》於今晚起播出，他們與Joe Junior踏足俄羅斯首都莫斯科及聖彼得堡，除前往當地著名景點：紅牆、救世主大教堂等外，更到太空人訓練基地，體驗人體離心機的測試；又會闖入俄羅斯軍事重地，一嘗野外生火煮食及搭營的滋味，以及到訪莫斯科夜店，體會激情夜生活。
無綫昨日發放的照片，見到行山路時，曾江搭着四哥膊頭，兩人坐在越野車上亦有傾有講。四哥心情靚靚，穿著太空裝備向鏡頭揮手，還站在坦克車上大擺Chok爆甫士。曾江亦跟胡楓玩自拍，在古怪屋做出趣怪表情；4個小生更在著名景點開心跳起，展現活力。
娛樂組
