【明報專訊】嚟自大陸嘅網絡電視樂視攞到英超獨家播映權，喺3日之內開咗兩次記者會，真係驚喜連連，除咗講極都講唔到英超收幾錢，噚日個記者會仲宣布2016年9月31號訂購有優惠，搞到網民大笑樂視「派膠」，仲有人話會等2月30號至「join」樂視。 聲控電視只辨普通話 樂視斬件式公布令坊間資訊錯漏百出，星期二嘅兩個半鐘頭記者會，又話無同第三方達成合作方案，搞到now TV有無得播成為羅生門。咁到噚日記者會，講咗成4個鐘，一度話月費99蚊，但最初無講清楚包唔包英超，又搞到有人以為包埋。 噚日除咗公布明年9月30號前(呢個至真！)訂樂視有優惠，仲公布會推聲控電視機，好勁㗎，係可以用把口叫電視機開機，又可以聲控揀節目，仲可以打電話。Emily見現場即席示範係講普通話，八卦問樂視講廣東話得唔得，點知原來個電視淨係識聽普通話！ 網友官方fb留言發炮 樂視講來講去，都講唔到球迷嘅核心關注，網友Billy Lam噚日就喺樂視嘅官方fb留言﹕「唔好講咁多廢話啦，直接講幾錢，有咩plan。仲話貼近香港人，香港人唔鍾意人賣關子，淨係需要結果、答案㗎！」
|
| |
| |
;){kind=small}
