本土手製果醬借尖嘴誠品開舖 台灣品牌推「麻將」帆布袋攻港
[2015.10.03] 發表
【明報專訊】尖沙嘴誠品生活今日試業第3日，Emily噚日「朝聖」，發現嚟嘅大部分係香港人。誠品引入42個專櫃品牌，台灣「過江龍」趁機攻港，亦畀咗機會本土小店首度開設門市。
有柑桔菠蘿玫瑰蘋果等口味
經營咗4年嘅手工果醬網店「Nicole's Kitchen」，老闆娘兼大廚Nicole話，專櫃以抽佣形式收租，租金負擔相對冇租舖咁高，仲可以同其他專櫃互助吸客，接觸多啲知音。Nicole自設廚房，盡量選用本地出產新鮮水果製作無添加果醬，主打食得健康。果醬有無花果紅酒、柑桔菠蘿、玫瑰蘋果等獨特口味，每樽80蚊至120蚊。佢話，希望香港農業發展更蓬勃，咁就可以蒐購更多靚水果喇！
台灣手製帆布袋品牌「廣富號」亦為咗今次攻港，特別設計「麻將」多用途收納袋，以及印有菠蘿油、凍檸茶等地道小吃嘅卡片夾，前者可以按個人喜好訂造特定顏色同麻將牌圖案，全部訂單都係台灣製造。另外有針對港人需要、特別多夾層嘅「港版」背包。
誠品生活副總經理蘇源拓話，各間分店有不同定位，盡量結合當區生活同文化，好似尖沙嘴店就努力引進更多創意種子。至於幾時再開分店，佢就話要講緣分。
更多港聞
【明報專訊】「報渣馬難過買iPhone！」一年一度嘅渣打馬拉松繼早前開始接受報名，全馬同半馬組別相繼額滿後，一向最受歡迎嘅10公里賽事噚日朝...
詳情
相關新聞
