【明報專訊】香港醫學專科學院噚日搞傳媒午宴，久未露面嘅衛生防護中心前總監曾浩輝(曾仔、神探輝)亦以社會醫學院副院長身分出席。無官一身輕嘅曾仔似乎好享受𠵱家嘅生活，仲好開心咁話搭港鐵都無人認得佢。問佢近排忙緊乜嘢，曾仔就話攻讀緊皮膚科文憑，間中亦有喺兩間大學醫學院教書。咁有無新醫院向佢招手呢？曾仔即時耍手擰頭，話自己「唔識㗎」，仲話費事累人喎。 曾仔百足咁多爪，近排仲考緊鋼琴演奏級，下個月有一場慈善音樂會要表演。被問到會唔會同一樣咁有音樂才華嘅港大醫學院院長梁卓偉合作，曾仔透露原來二人早已合作過，10年前試過「四手聯彈」；咁有無「四目交投」呀？曾仔就話因為咁而彈到啲音錯晒。曾仔仲話一年去咗四五次日本旅行，大家當然最關注佢同邊個去，曾仔唔講之餘，仲反問記者﹕「你係咪想同我去？」
|
| |
| |
