【明報專訊】建制派經常鬧爆泛民議員拉布，估唔到中央政策組首席顧問邵善波反而話，立法會流會建制派有責，話建制溝通不足、「行動不夠一致」，「坐定定怎會流會，這個已經是失職」。 邵善波喺北京出席政協會議，接受《星島日報》同《經濟日報》訪問。佢話立法會近年陷拉布困局，亦顯示建制派唔夠團結，反而泛民雖有唔同山頭，但協調不俗。佢仲不點名批評立法會「那些主席」，無負起把關責任執行《議事規則》，好似有議員喺議事廳走來走去都唔處理。 佢喺訪問中都幾唔客氣，話建制派溝通不足，「四十幾個人各自搞搞震」、「不要說撐不撐政府，你自己負責的東西，每月出十萬蚊糧你都不來」。邵善波又講到「旺角暴亂」，話有人將事件推到政府管治上，係「政治鬥爭」，又話就算前特首曾蔭權當年一樣被人對付到殘，所以唔認為換咗特首就可以解決問題。
|
| |
| |
