【明報專訊】巿民無論去美國公幹或旅遊，美國簽證期滿後要續領，一般都需要再次會見領事館職員，回答相關問題先可以領取證件。美國駐香港及澳門總領事館噚日公布新安排，續簽美國商務、旅遊、學生等簽證嘅市民，由今年1月起可以透過網上遞交表格，免除過去要到領館接受職員面談嘅程序。 美國駐港澳總領事館非移民簽證部主管艾禮峯話，計劃適用於續領商務、旅客、過境、船員或航空機組人員、學生同交流訪客簽證嘅市民。只要係香港居民、無改過名，就可以喺美國簽證期屆滿後嘅12個月內，以網上遞表續辦(www.ustraveldocs.com/hk)美國簽證，去7-11便利店交款，將繳費單連所需文件帶到領事館，7至10個工作天後已經拎到新證，慳番面見時間，申請簽證價錢仍然喺1280港元。 艾禮峯補充，計劃唔適用於第一次申請簽證嘅申請人，計劃亦唔保證續證申請人可豁免面見程序，領事館如認為有需要，仍可要求面見，亦會不時隨機抽樣面見一啲申請人。
|
| |
| |
