【明報專訊】香港大學校委會每次開會都會邀請一個院長報告學院情况，噚日輪到法律學院院長何耀明，Emily據聞校委成員質詢咗佢大約45分鐘。有消息人士話，主席李國章一開波就提及，教資會研究評審報告顯示，港大法律學院表現冇從前咁好，更被中大法律學院超越，問何耀明點睇。 另外，都有唔少校委提出質詢，包括法律學院嘅研究情况、教員嘅博士比例等等。何耀明都話對評審結果變差唔滿意，但大致上有答校委質詢。 消息﹕李質詢大致公道 港大法律學院之前不斷被左報攻擊，但消息人士話，噚日李國章嘅質詢大致上都算公道，有引述數據同評審結果，冇刻意刁難，但都有委員覺得質詢太細緻同埋質詢太耐。 校長馬斐森之前喺開學禮話，港大管理層覺得港獨唔係可行選擇，有消息就指，學生會會長、本科生校委孫曉嵐噚日問校長，點解突然就住政治議題表態，校長話同管理層討論過，考慮到港大同中國聯繫緊密，出於大學利益決定咗呢個立場，但強調尊重言論自由。
|
| |
| |
