【明報專訊】渣打馬拉松每年都有唔少名人參加，Emily噚日就喺現場捕獲商務及經濟發展局長蘇錦樑同明年卸任中大校長嘅沈祖堯。 蘇錦樑著本地設計運動衫 蘇錦樑著住本地設計師設計嘅運動衫參加10公里賽事，話要支持本地生產。佢話自己用咗個半月備戰，朋友仲話佢練跑之後瘦咗𠻹。 體育、演藝、文化及出版界立法會議員馬逢國都跑10公里，佢話平時都係趁立法會「拉布」時喺立會用跑步機運動，無乜練習，所以喺1個鐘頭10分鐘內完成賽事已好開心。工聯會議員陸頌雄同自由黨李梓敬都有參賽。 同係跑10公里賽嘅沈祖堯就話，今次係第一次，亦可能係最後一次用校長身分去跑，沿途亦都有唔少學生及校友同佢打招呼。佢話練跑之後瘦咗好多，選手服都唔啱身，仲講笑話自己咁老都跑到，希望鼓勵年輕朋友。 港協暨奧委會副會長霍啟剛亦有參加10公里，佢話滿意自己表現。被問到會否同囝囝參加親子跑，佢就話阿仔𠵱家年紀太細，將來或會考慮父子兵上陣。
|
| |
| |
;){kind=small}
