【明報專訊】去年落選立法會嘅前議員黃毓民，噚日喺facebook貼出8000字長文，表明自己會「向政治說再見」，「不再從政，退出政壇；包括不會參加或組織政治團體，不會參加選舉」，包括嚟緊嘅立法會補選，但會繼續主持網台節目同撰寫時論。 青年新政梁頌恆同游蕙禎月前被取消議員資格，選前曾經痛批九龍西對手游蕙禎嘅毓民話，相信梁、游兩人會參加補選，政治倫理上唔應該去爭原本屬於佢哋嘅議席。毓民話，香港政治處於世代交替嘅時刻，「像我們這些『嬰兒潮世代』的人，不應阻擋年輕人的前路」。 年屆65歲嘅毓民話，自己逐漸走向古稀之年，有嚴重眼疾，「三高(高血脂、高血壓、高血糖)亦佔其二」，係時候「向政治說再見」。佢最後寄語年輕人「必須冷靜沉著，不能盲動，不作無謂犧牲」、「在沉潛期間可以更加堅定信念」，「時間在你們這一邊」。
|
| |
| |
