互罵「躝癱」「潑婦」 碧雲國勳駁火 搞到休會

互罵「躝癱」「潑婦」碧雲國勳駁火搞到休會

[2017.07.18] 發表

【明報專訊】各界關注政府幾時會就梁頌恆、游蕙禎，以及上星期五法院裁定羅冠聰、劉小麗、姚松炎及梁國雄(長毛)喪失嘅議席舉行補選；立法會政制事務委員會噚日開會，呢個議程就引發民主黨黃碧雲及民建聯劉國勳對罵，會議最終休會作結。

「民主黨咁快吼住補選」觸發

話說會議到「其他事項」時，黃碧雲要求政府交代補選安排，委員會主席廖長江質疑提問與會議議程無關，官員可選擇係咪想回應。及後黃碧雲要求政制及內地事務局長聶德權承諾，將梁游議席及「DQ4」議席唔好綑綁處理。主席再次質疑問題與議程無關，黃碧雲就話「主席你唔好成日擋住官員作答啦」，但廖長江堅持黃唔應該問議程無關嘅問題，一人一句下，廖長江於是話「請你收聲」，並安排另一議員劉國勳提出問題。

劉國勳隨即揶揄，唔明白點解咁急要就「DQ4」提問，話4人係咪去法院上訴都未知，「民主黨咁快就吼住補選」係無需要，黃碧雲隨即大聲批評劉國勳胡亂猜測佢嘅動機，要求劉收回言論及道歉。劉國勳強調只提及「民主黨」、唔一定係講黃碧雲，但黃碧雲就話會內得佢一個民主黨成員，而主席就認為劉國勳無違反議事規則。黃碧雲唔服氣，狠批廖長江偏袒劉，廖長江即使熄咗黃碧雲個咪，仍無阻佢繼續發火，喺座位大罵。

黃碧雲後來更指「民主黨抗議民建聯呢個『躝癱』喺呢度隨便含沙影射民主黨」，劉國勳不甘示弱，「好心啦，人哋解釋咗議事規則畀你聽，唔好一嚿雲啦你，成個潑婦咁」。黃碧雲同劉國動僵持不下對罵，最終廖長江指唔認為會議可以繼續，宣布休會。

更多港聞