【明報專訊】民主思路上周訪京期間，召集人湯家驊(Ronny)同港澳辦主任張曉明單獨賞櫻談政事，Ronny形容會面「很特別、很浪漫和有戲劇性」，此話一出網民熱議，有人話兩個男人嘅浪漫惹人遐想。Ronny噚日解釋唔係「男女嘅浪漫」，而係「好有詩意嘅浪漫」，仲話啲櫻花其實「唔係開得好靚」，但二人志在喺輕鬆嘅地方討論嚴肅問題。 Ronny仲話同張曉明個人關係「提升咗少少」，指過往一直認為張好強硬，「今次佢嘅態度係令我有少少吃咗一驚」。至於點解Ronny會同張曉明單獨賞櫻？Ronny噚日喺商台《在晴朗的一天出發》中話，當日拜訪港澳辦時，「坐低傾唔夠兩句」，張曉明就突然間問佢「你嘅鞋行唔行得路」，Ronny回應話「我對鞋梗係行得路啦」，張聞言就入房換衫換鞋，帶咗Ronny去賞櫻。Ronny話，訪京目的不在賞櫻，但難「逆主人家意」。 談一國兩制「有爭拗」 賞櫻談政事浪漫，但原來二人會面期間「有爭拗」。Ronny指談及一國兩制界線嘅問題、選舉權利同對國家尊重嘅問題時「有爭拗」，因為Ronny認為一國兩制下， 唔需要擁護或效忠共產黨，才有選舉同發言權。但Ronny話，中央政府對於有人唔尊重政府同共產黨，有啲「唔係咁開心嘅睇法」。
|
| |
| |
