林鄭：明報得獎照 記人生重要時刻 日花45分鐘睇9份報章
[2018.05.01] 發表
【明報專訊】每年一度嘅報界盛事、香港報業公會「2017年香港最佳新聞獎」噚日頒獎，《明報》奪得14個獎，冠軍數目係各報之冠。特首林鄭月娥出席頒獎禮致辭時形容，佢係「香港紙媒嘅忠實擁躉」，日花45分鐘睇9份報章，睇完隻手真係黑晒㗎，傳媒同業嘅報道成為佢施政其中一個動力。林太又提到，前線記者採訪係「搵命搏」，唔願意見到大家人身安全受影響，所以同警方交代過，要同傳媒緊密聯繫。
《明報》攝記鍾林枝憑一張喺林太參選記者會影嘅「踏上選戰之路」，贏得最佳圖片(新聞組)冠軍，林太話佢睇過張相，形容無一張影到佢咁嚴肅、凝重同埋緊張，相片記錄佢人生下半場一個重要時刻。鍾林枝領獎時，林太都有上台合照。
交代警方要同傳媒緊密聯繫
香港報業公會主席甘煥騰致辭時話，雖然唔少人話紙媒已死，但佢認為報紙仍有得做，面對網媒競爭，報業依然發揮優點，包括喺面對大量資訊下，一班有經驗嘅新聞工作者可以為讀者提供中肯、多角度分析嘅報道，白紙黑字印出嚟嘅報紙，當中嘅閱讀效果唔係其他媒體可以取代。
報業公會今屆共收到594份來自超過10間報館嘅參賽作品。《明報》舊年揭發興德學校影子學生問題、揭示投資者通過一約多伙仍能以首置身分繳納較低稅率嘅印花稅，兩個報道分別贏得最佳獨家新聞冠軍同最佳新聞報道冠軍。記者李詠珊憑「語言鑑證專家 一個's看出不尋常」報道贏得最佳新聞寫作冠軍，攝記鍾林枝及鄧宗弘分別贏得新聞組圖片及特寫組圖片冠軍。Emily恭喜各位同事，來年要繼續努力，報答讀者嘅鼓勵同支持。
更多港聞
【明報專訊】公屋一般禁止養狗，但社會有聲音話，想政府准許受訓中嘅導盲幼犬喺公屋寄養。運房局噚日喺立法會文件透露，香港導盲犬協會同埋香港導盲犬...
詳情
相關新聞
