話識過馬路游水 劉業強倡引入野豬天敵
[2019.01.11] 發表
【明報專訊】Emily噚日報道野豬原來最多喺南區出現，經民聯劉業強噚日喺立法會答問大會上，問特首林鄭月娥可以點樣保護市民免受野豬襲擊，仲話啲野豬會「橫過馬路同游水過海」，更建議引入野豬天敵，減少野豬數量。
劉業強話，最近好多市民反映有野豬喺鬧市出沒，會橫過馬路同游水過海，自己部手機有十幾條野豬出沒短片。Emily上網一睇，有網民曾喺兩區公眾碼頭對出海面見過有野豬喺維港暢泳，之後喺市區行嚟行去。
劉業強希望漁護署狩獵隊重出江湖，又建議引入野豬天敵，至於野豬天敵係啲乜，佢就冇提到。Emily上漁護署網頁睇過，話香港其實缺乏野豬嘅天敵，網上則話老虎、狼、鬣狗等先會獵食野豬。
林鄭月娥承認野豬出沒係事實，形容野豬會「聯群結隊」，亦唔驚人，有要求漁護署檢視相關處理工作，話呢個議題喺政府內非常關心，希望漁護署整全要做嘅工作後，可以喺相關事務委員會交代。
更多港聞
【明報專訊】環境局長黃錦星不時公開電費單證明自己好慳電，啱啱上年12月嘅電費單，星星局長完全唔使畀電費，林超英都唔夠佢嚟。特首林鄭月娥喺呢方...
詳情
相關新聞
