【Emily】職工盟請人 部分前議助應徵
[2021.08.04] 發表
【明報專訊】唔少前區議員、議助辭職變失業，同時職工盟原來請緊人，早前出post分別聘請傳訊主任、工會組織幹事、中心組織幹事。職工盟總幹事蒙兆達同Emily講，部分應徵者曾經有出任議員助理、為議員做資料蒐集等嘅經驗，但暫時未見有前區議員。佢話期望請番同路人，認為如果有社會運動經驗會比較易適應崗位。
職工盟今次亦要求應徵者以「我希望在這個崗位推動或實現什麼改變？」為題撰寫短文，連同個人履歷喺聽日前電郵或郵寄遞交。被問到現時政治風險下應徵者會唔會卻步，蒙兆達就話可能會有人怕政治風險，但申請得嘅人都清晰認同職工盟嘅理念，雖然唔算好多人申請，但唔少應徵者都係有心人咁話。
更多港聞
相關新聞
