【Emily】李永達風波 阿尹隔牆鬧黨友「契弟」
[2021.08.10] 發表
【明報專訊】民主黨副主席李永達去咗英國，將黨內嘅分歧暴露出嚟。民主黨中委蘇逸恒上周六(7日)喺facebook出post，大字標明「#叫人衝 #自己鬆」，仲獲黨副主席梁翊婷畀like加持。因初選案還押嘅尹兆堅知道之後，忍唔住要爆，叫人帶話出嚟，幫佢喺fb出post叫某啲黨友收聲，話「寫得出『叫人衝、自己鬆』的契弟，你最無資格發言！」阿尹又唔點名批評「#鬼頭鬼相仲要寸嘴」、「#黨到底有幾個副主席」。
中委蘇逸恒出帖「叫人衝自己鬆」
阿尹話已故黨鞭司徒華教落，「你唔出聲無人話你啞㗎！」佢話唔知李永達面對啲咩狀况或威脅，「心中只有憂慮和祝福，希望佢平安」。
阿尹話唔開晒名講粗口已好克制，「一直以來你都係機會主義者，立場前後反覆，把口時激時縮，講到尾都係睇形勢」。佢仲話黨內有人「呢半年無為個黨分憂，仲結黨結派鑿沉船、拖後腳。𠵱家仲要出嚟抽水？呢群一丘之貉，唔好逼我開名揭你底牌！」
Emily搵過蘇逸恒，佢只話超多人講過「叫人衝 、自己鬆」，無特別回應。
更多港聞
【Emily】顏汶羽做爸爸 太太誕3.79公斤顏仔
【明報專訊】民建聯區議員顏汶羽近日有喜事，前晚啱啱做咗老竇，太太開刀誕下3.79公斤嘅顏仔，顏仔一出世已頭髮濃密，好精靈。汶羽同Emily講... 詳情
相關新聞
