【Emily】卓永興唔想叫「鼠王興」 梁美芬話「鼠王」無專利
[2022.08.19] 發表
【明報專訊】副政務司長卓永興前日出席立法會「前廳交流會」，向議員講笑咁話唔好叫佢「鼠王興」，因為個名有專利，擔心有「鼠王芬」之稱嘅經民聯議員梁美芬嬲。梁美芬當年空降參選九龍西大打地區鼠患問題，佢噚日喺facebook少有開腔講跟咗自己多年嘅花名，話「鼠王」無專利，期待除咗卓永興畀人叫「鼠王興」之外，有更多官員議員齊齊做「鼠王」，最好區區有「鼠王」。
梁美芬話，自己係大律師同大學教授出身，所以身邊唔少朋友唔鍾意外界叫佢「鼠王芬」，覺得個花名貶低咗佢，戥佢唔抵。不過，佢事隔多年為「鼠王」正名，話如果議員因為跟進民生議題畀人嗌花名，其實係市民嘅一份肯定，顯示肯貼地跟進鼠患。佢話，如果官場政界多一個「鼠王」，就代表多個人肯排解民生憂難，卓永興真係做到「鼠王興」，對市民嚟講係好消息咁話。
更多港聞
相關新聞
