【Emily】鄧炳強拖住太座視察沙頭角
[2024.01.02] 發表
【明報專訊】沙頭角噚日起開始第二階段開放，保安局長鄧炳強朝早10點半左右帶團去區內視察，除咗有青年組織代表，佢太太都有陪同視察。雖然紅假要工作，但鄧炳強夫婦睇落心情唔錯，大部分時間仲手拖手，表現恩愛。
兩人並肩走入第二階段尚未對外開放嘅中英街，行咗約10分鐘先返回開放咗嘅區域，順道到訪中英街檢查站旁邊一間餐廳，外面有一幅印有簡體字「熱烈祝賀沙頭角禁區第二期開放」嘅橫額。佢哋又去咗一間買補品同小食嘅店舖，老闆娘熱情招待，大喊歡迎，鄧太買咗一盒糯米糍同補品。
鄧炳強之後去咗附近中英街花園同郵局，會見記者嘅時候只聽到佢聲音沙啞，佢主動提及聲線唔係太好，並祝願大家新年快樂，身體健康。
更多港聞
相關新聞
