【Emily】「牛記辦館」開幕 SEN青年擺檔
[2025.08.13] 發表
【明報專訊】位於裕民市集嘅「牛記辦館」噚日舉行開幕禮，呢個「辦館」由食環署及牛頭角區街坊福利會主辦，邀請本地年輕人及有特殊教育需要(SEN)嘅青年營運25個空置攤檔。除咗售賣由兩間特殊教育學校、即香港紅十字會瑪嘉烈戴麟趾學校及中華基督教會望覺堂啟愛學校學生製作嘅手工藝品，福利會仲想透過聘用SEN青年，增加社會對佢哋嘅認識同理解，鼓勵僱主開放更多適合佢哋嘅職位。
「牛記辦館」係食環署去年中推出嘅試驗計劃，透過同非牟利組織合作，以臨時小販形式營運空置攤位。計劃現時進入第二階段，暫營運6個月至年底。25個空置攤檔中，其中11個開設懷舊士多，平賣糧油食品及日常用品等，仲有茶餐廳卡位等「打卡」位，畀大家懷舊一下。
更多港聞
相關新聞
