【Emily】調查：40歲或以下港人 42%有老花症狀
[2025.10.01] 發表
【明報專訊】都市人手機不離眼，奧比斯同香港眼科學會最近做嘅老花風險調查，就發現四成40歲或以下嘅香港人已有老花症狀，可能同長時間睇電子屏幕有關。今次調查訪問1900多人，超過一半話自己有老花，但當中一半無戴老花眼鏡。
老花一般喺40歲左右出現。呢次調查喺今年8月至9月訪問1936個30歲以上嘅成年人，其中40歲或以下嘅有250人，當中42%已出現老花症狀，好似夜晚視力變差、有時要拉遠手機先睇得清、難以睇清細小字體。
調查機構引述唔少研究指出，長時間近距離用電子產品，特別係手機，容易令睫狀肌疲勞，影響眼睛調節能力，因而出現類似老花眼嘅症狀，而早發性老花可以喺35歲就出現。調查機構提醒大家要正確用眼，包括唔好喺光線不足下閱讀或睇電子屏幕，又建議遵守「20-20-20」法則，即係每睇20分鐘電子屏幕就休息20秒，望去20呎以外嘅景物。
更多港聞
相關新聞
