【明報專訊】學聯秘書長周永康(Alex)前日接受政壇元老李鵬飛訪問，遲到個幾鐘，要鞠躬道歉，點知話口未完，噚日又出事。話說Alex噚日約咗一大班記者下晝兩點半，喺中區半山前特首辦，打算向全國政協副主席、前特首董建華遞信，但就遲咗成45分鐘先現身，原來Alex一日跑幾場，之前去咗沙田恒生工商管理學院出席分享會，搞到下晝2點25分先上到的士去中環，Alex事前事後都認錯，仲話再遲到就真係要跪低咁話。 其實Alex前日接受訪問，已經因為周三晚旺角有衝突，搞到接近清晨先瞓，所以遲到，結果接住落去嘅飛哥訪問要順延。 噚日Alex去恒管出席分享會，準時12點半現身，但分享完又接受記者、同學採訪，佢事前無計劃好交通，結果搞到活動完咗先call的士，當然出事啦。 Alex曾經諗過只由學聯常務秘書鍾耀華遞信，但最終都趕咗去前特首辦，擔起遞信重任，不過一班攝影記者、camera man面色就幾難睇，因為工作因為佢又拖延咗。Alex就喺接受訪問前後都道歉，好彩董伯伯唔係真係喺度等佢。 上場三點完 下場兩點半 Emily睇番，恒管活動嘅採訪通知，時間係去到下晝3點，咁其實Alex又點樣兩點半分身喺前特首辦出現呢？Emily都知學生代表好忙、好辛苦，寄語佢哋安排日程預鬆少少時間，唔係日日遲到，又點提升學聯喺「姨媽姑姐」心目中嘅形象？
|
| |
| |
;){kind=small}
;)
