夏千福拜年學撕紙
[2015.02.19] 發表
【明報專訊】被形容為「中國通」嘅美國駐港總領事夏千福廣東話一向了得，噚日領事館喺facebook發布咗夏千福「擔正」嘅2015年「賀歲短片」，夏千福以廣東話演繹。
夏千福首先喺領事館內問吓農曆新年有咩好去處，有職員話每日要處理好多簽證申請，唔得閒答，至於新聞文化處發言人，更加直接官腔回應「no comment」，隨即用過去不時狠批英美為外國勢力、干預香港嘅《大公報》遮住自己，十分搞笑。
夏千福其後問咗「經濟與政治部總監」(其實係一隻綿羊公仔演出)，就去咗九龍寨城公園，搵人稱「敏叔」、從事撕紙藝術嘅李先生教佢，用紅字撕出「春」字，敏叔仲為夏千福撕咗個剪影?。夏千福最後同一眾總領事館人員，喺領事館門口同大家拜年，用廣東話大聲祝賀「新年快樂！大吉大利！恭喜發財！」
更多港聞
相關新聞
