【明報專訊】近排唔少人因為TSA風波而更關注香港學生嘅發展，噚日立法會議員蔣麗芸(Ann姐)喺facebook上載咗《蔣麗芸會客室》訪問教育局長吳克儉嘅片段，大談生涯規劃。吳克儉就鼓勵香港學生多元化發展，話要終身學習，仲透露細個托米掙錢嘅經歷。 Ann姐問吳克儉當年生涯規劃係點，年過六十嘅吳克儉就透露自己喺初中會幫屋企或附近舖頭做嘢，仲靠送貨掙錢，曾經托過三四十斤重嘅米，每袋仲掙到5蚊𠻹，佢話掙到錢之餘仲鍛煉到體格，接觸多啲人。 話一程飛機可睇十幾本 局長仲話中學嘅時候得英文拎C，其他科目統統攞A。為咗增值，佢主動進修，畢業後仲要求自己一個月要睇到30本書或者雜誌，話讀書學嘅知識唔係止於某啲專科，亦有助豐富人生閱歷。上任後不時外遊嘅局長同Ann姐講，一程飛機坐十幾個鐘，已經可以睇到十幾本。Emily相信局長應該要不眠不休咁睇書，咁嘅閱讀速度令人非常好奇，到底佢係讀啲咩書呢？
|
| |
| |
;){kind=small}
;)
