【明報專訊】新界西候任立法會議員朱凱廸由民望低迷逆轉變票王，被形容係選舉中嘅「巴基之星」；而真正嘅「巴基之星」唞暑兩個月後，噚日踏足沙田馬場出賽，再次施展包尾變第一嘅「大奇蹟」逆轉跑法，睇到馬迷同網民拍爛手掌。 怕擁躉失望 馬主﹕終有覺好瞓 巴基斯坦裔商人馬主Kerm Din(丁志強)賽後話終於可瞓得安樂喇，「近兩日真係瞓得唔太好，無論香港或海外，太多人問我馬嘅機會，有咁多人支持，亦唔想令人失望，現時終於贏馬」。佢話愛駒今仗起步比佢哋預期嘅更慢，「一度擔心佢追唔到」。 最後300米連過13隻馬 「巴基之星」噚日喺第10場出戰三班1400米草地賽，繼續同上次拍檔、騎師蔡明紹拍住上，更被捧為1.7倍大熱門。呢隻初生之犢保持「本色」，一開閘大墮後包尾，被頭排馬拋離，後來愈墮愈後，去到最後400米仍喺包尾位置，不過粉絲未驚過，皆因見識過佢上次嘅威猛表現。果然轉入大直路先係「巴基之星」嘅舞台，只見佢喺最後300米發力，逢馬過馬，一條直路就追過13匹馬，以超過一個馬位優勢衝線奪冠。呢次係繼7月1日回歸紀念日賽馬後，再次表現佢「大奇蹟」嘅跑法，唔少馬迷大讚佢有馬王風範。 練馬師告東尼賽後話，「目前我會話佢係一班馬，至於係咪一級馬，現階段言之過早。」騎師蔡明紹話現階段好難評論巴基之星可以走得幾遠，「但我相信佢正不斷進步」。無論如何，巴基之星嘅拼勁已經贏盡馬迷嘅心。
|
| |
| |
;){kind=small}
;){kind=small}
;){kind=small}
;)
