【明報專訊】喺深水埗經營「北河燒臘飯店」嘅明哥(陳灼明)，派飯畀區內基層都有8年，今日起嚟緊一個月，佢就去到蘭桂坊義賣飯盒，中環打工仔女食晏除咗可做埋善事，仲可以慳啲錢，因為每個飯盒只賣32元。 每盒32元 盼籌款夠派4萬個飯盒 今日至下個月15號，每日上午11點半至下晝兩點半，明哥會喺蘭桂坊一號地下大堂準備3款撚手小菜飯盒，組合日日唔同，當中一款係素菜，明哥話飯盒味道調校過，唔驚OL唔啱食。 今次飯盒義賣活動，扣除成本後會撥落明哥月底成立嘅「北河(明哥)慈善基金」，如果大家以Android Pay手機服務畀錢，個飯盒加1蚊會送罐裝飲品，Android Pay亦會額外捐出4元畀基金。今次目標係籌募夠派一年嘅4萬個飯盒經費。 明哥話，今年3月佢另一間舖「北河點心茶餐廳」因業主加租差啲執笠，好彩有同區業主相助，舖頭重開並改為社企自負盈虧運作，名為「北河同行(深水埗)」，𠵱家配合埋基金運作，除咗可以幫深水埗區街坊，遲啲仲可能去觀塘、黃大仙同元朗等多窮人嘅地區開設社區飯堂。明哥仲話好想幫埋滯留香港嘅酷刑聲請人士，但為奉行「香港錢幫香港人」原則，佢會睇吓美國駐港總領事館可唔可以幫手推動呢個計劃。
|
| |
| |
;){kind=small}
;)
