陳曉峰選人代 霍啟剛幫手拉票
[2017.12.09] 發表
【明報專訊】港區人大代表選舉進行得如火如荼，今屆競爭激烈，參選人之一自由黨成員、律師會理事陳曉峰(Nick)話呢排日日都要趕好多場人代候選人見面會，積極拉票，佢仲請到一度傳出會參選人代嘅香港青年聯會前主席霍啟剛幫手，做佢嘅選舉顧問。
唔講唔知，原來Nick因為曾經留學澳洲，煮得一手好菜，平時係屋企嘅伙頭大將軍，負責一對仔女返學嘅餐盒，佢熱愛烹飪同美食，仲喺律師會成立咗個烹飪、美酒佳餚小組，每年同班律師去法國、四川等地方搵美食。佢同Emily講，烹飪嘅天分係遺傳自媽媽，只要講得出嘅食物，佢都煮到，而佢嘅仔女亦遺傳到呢個天分。Nick話呢排忙於選舉，要暫時放低鑊鏟一段時間，仲話可能因為咁連身形都瘦咗啲。
更多港聞
相關新聞
