余德丞開腔報平安﹕可以醒番真係好好彩
【明報專訊】28歲無綫新晉藝人余德丞本月8日晚參加足球賽時感不適後昏迷，被送往瑪麗醫院深切治療部搶救，情况一度危殆，圈中好友及關心他的人都為他集氣，祝福他。其後余媽媽兩度向傳媒報喜，說余德丞已初步蘇醒，之後再表示已可跟家人傾偈及進食。到本月13日，他轉往心臟科病房觀察。昨日余德丞親自開腔透露身體狀况，說事發時心臟曾停了一段長時間，可以醒番真是好彩。他感謝大家為他集氣，希望快些出院食餐好及飲珍珠奶茶。
余德丞(Dickson)昨日透過無綫官網big big channel報平安，播出一段他的錄音，聽到余德丞的聲線很精神，中氣十足。
余德丞說﹕「Hello，咁多位大家好，我係Dickson余德丞，我真係覺得自己好好彩，非常之感恩，非常之開心，今次可以大步檻過，醒得番再同大家講嘢，所以衷心多謝全香港每一位關心、問候、祝福、集氣，令到我能夠醒得番，真係衷心多謝咁多位。其實真係醒番先知道，原來件事都幾嚴重，因為原來昏迷時候，我個心臟都停咗一段幾長時間，所以……能夠起得番身，再同大家傾偈，真係好好彩！」
「心臟停咗一段幾長時間」
余德丞續道﹕「我呢幾日已慢慢康復，精神咗好多，講嘢都清楚咗，當然醫生都建議留院多一段時間，Check清楚身體係咪真係OK先可以出院。最後真係多謝瑪麗醫院上上下下醫護人員悉心照顧，同埋喺關鍵時刻幫我做心肺復蘇的足球隊隊友，仲有屋企人每日嚟支持我，整嘢畀我食，同TVB上上下下咁多位好同事，以及咁多位傳媒朋友，無咗你哋邊一位都唔得，所以希望快啲出院同大家見面，有咩新消息再通知你哋，記住，身體健康最重要！」
望快出院飲珍珠奶茶
余德丞到晚上6時許更新社交平台，他在Instagram上載穿背心站在陽光下的照片，並留言道﹕「喺呢段日子，好多謝全香港，你哋每一位嘅關心問候祝福同支持，希望可以快啲出院食餐好同飲珍珠奶茶！」他又引用偶像陳奕迅的歌曲《今日》其中一句歌詞：「 #抬頭吧黑暗過會是晨曦 #集氣成功 #多謝大家 #hk #hkig #instadaily #yuts。」
文﹕娛樂組
■更多娛樂猛料 ﹕ol.mingpao.com
范振鋒見Dickson上線﹕終於放心 林作感激黃意雅教唱歌
【明報專訊】創作歌手黃意雅（Cynthia）昨日為新歌《被蹂躪的心》拍攝MV，林作和范振鋒到場支持。問黃意雅會否為林作寫歌？她表示之前已寫了... 詳情
彭浩翔鄒凱光劉翁開棟篤笑 想黃子華「金盆反口」復出
【明報專訊】導演彭浩翔、鄒凱光及劉翁昨日出席「翔揸劉灘之潮潮的吹」記者會，宣布10月假灣仔演藝學院舉行兩場棟篤笑。3人表示因黃子華金盆𠺘口... 詳情
