【明報專訊】疫情令唔少社福機構受影響，好似「惜食堂」咁，佢哋一直推行食物回收同援助計劃，向有需要嘅人免費提供熱飯餐，但因應疫情亦要改成一星期派發一次「食物包」畀服務使用者，惜食堂話利希慎基金知道後，主動提出幫助，贊助呢項臨時措施。 疫情影響回收食物 要買糧食派 惜食堂話，部分慈善機構伙伴因疫情關係暫停服務，現時繼續服務嘅慈善機構伙伴同惜食堂加埋，服務使用者共約有5000人，當中九成係長者，由於食物回收方面只維持有限度服務，佢哋要購買糧食代替回收食物，以滿足每次派發近5000份包括蔬菜、罐頭、冷藏同埋五穀類等食物。利希慎基金總裁何宗慈話，得悉應急食物包嘅重要性，於是第一時間聯絡惜食堂贊助呢個措施。 中總透過中聯辦向內地捐400萬 另外，香港中華總商會噚日透過中聯辦向內地捐款400萬元，支援內地防疫抗疫工作，中總領導層噚日去咗中聯辦捐支票，由中聯辦副主任譚鐵牛代表接受。中總會長蔡冠深話，中總會員各自透過不同方式同途徑支援抗疫工作，包括向內地同香港捐錢、捐物資逾2000萬元，中總上月亦兩度向市民免費派發3.2萬個口罩。
|
| |
| |
;)
