【Emily】袁海文攞報刊牌 再登記功能界別
[2020.04.18] 發表
【明報專訊】民主黨深水埗區議員袁海文撈過界，噚日多咗一個身分，做埋Emily「行家」，晉身報刊老闆！袁海文同Emily講，佢啱啱申請到政府嘅報刊發行人牌照，合法出報紙，佢咁做嘅目的，係令自己可登記做體育、演藝、文化及出版界功能界別團體選民，幫手搶攻呢個由建制派主導嘅立法會同選委會議席。
袁海文同Emily講，議辦一向有印製《四小龍時報》，同選區街坊報告區情，於是去申請報刊發行人牌照，仲話4月1日交齊文件，兩個禮拜就攞到牌，呼籲有心人快啲申請，攞牌後再申請做功能界別選民，新登記選民5月2日截止。佢話體育、演藝、文化及出版界功能界別涉及唔同行業，部分界別好難「攻破」，但出版界門檻唔算好難，所以盡力去做，就算9月立法會唔夠票，都可以諗長遠少少搶攻選委會議席。
更多港聞
【明報專訊】立法會內務委員會噚日會議仲未選出主席，泛民、建制就公民黨郭榮鏗應唔應該繼續主持主席選舉，再度唇槍舌劍。民建聯周浩鼎無發言，不過都...
詳情
【明報專訊】司法機構噚日宣布委任周慧珠、翟國怡、林澤銘、楊綺娜、蕭志韻、龍軍庭、屈麗雯、余俊翔及施祖堯為常任裁判官。有關任命係由行政長官根據...
詳情
相關新聞
